新一屆特首戰倒數，八方偶爾都會諗番起當年梁、唐之爭，唐唐失分之處，除咗被爆有感情缺失同埋僭建之外，相信失言都係一大死因。
5年前今日，梁特啱啱探完囝囝返港，唐唐就去咗社聯嘅論壇，被鬧爆做司長期間，對少數族裔、弱勢社群嘅訴求不聞不問；唔單止咁，唐唐仲對住成班冇份喺特首選舉中投票嘅人，好坦白咁話：「唔係為咗爭取你哋嘅選票」。
其實唐唐講錯嘢，唔係新聞喇，之不過梁特又好得幾多呢？呢幾年佢教曉大家乜嘢係語言偽術，標準工時、取消強積金對沖呢啲，講就天下無敵，做就有心無力，自己嘅僭建、UGL事件等，更加凸顯佢嘅花言巧語，失言固然唔好，謊言就直頭係差。當年CY嘅甜言蜜語的確冧爆唔少人，但苦口或者先係良藥，唔知港人會唔會再揀錯？