禮拜日沙田八草兩泥賽事，草地用全闊A欄作賽，睇番上季10月25日沙田錦標及精英碗賽日亦係用A欄，當日10檔以外馬包辦逾半數頭馬，而且大利後上馬，如「神電金剛」、「進綵」、「電子鳳凰」、「團圓飛舞」及「步步友」都係從中後位置衝上反先對手，所以靠後勁食糊之馬匹不妨優先留意。
今戰列陣馬中，第四場「好叻仔」上仗正是於A欄後上入Q，等番同一移欄再跑有力贏馬補中。另外，第二場「又襟又準」跑田A欄一次即勝，亦係全場唯一贏過此移欄之參戰馬，場地性能咁好千祈咪睇小。
至於兩場泥地都係跑1200米，今季六場同程之放頭馬勁取三勝兩位，第一場「永得米」及第五場「盈利駿馬」等擅跑泥地之前領馬值得睇好。