中國國家隊喺世盃外亞洲區12強賽踢咗四場得一分，高洪波辭職走人，據報中國足協已經決定由納比接手爛攤子。不過，傳「銀狐」上任年薪高達2,000萬歐元（約1.7億港元），要靠中超廣州恒大老闆之一許家印資助。中國足協周四透過微博宣佈，會喺11月前確定國足新帥人選，但國內同意大利唔少傳媒都好肯定會由納比接任，後者日內就會同足協傾細節。68歲嘅納比喺2006年帶領意大利贏世盃，到2012年來華教恒大又贏盡錦標，但要扶起國足呢位「阿斗」，就真係祝納比好運咯；據講佢會簽訂三年稅前年薪2,000萬歐元合約，咁大筆數足協都幾難負擔，好在恒大老闆許家印樂意出手買單，當為中國足球出一分力。