世上痴男怨女何其多，這邊廂馬來西亞待嫁新娘大排筵席，怎麼知道如意郎君臨陣逃之夭夭，剩下穿大露背婚紗的她獨守空幃慘慘戚戚食自己；那一頭阿聯酋沙迦某男帶新婚妻子海灘嬉水，驚見枕邊人落了妝的廬山真面目，「呢個女人邊個嚟㗎？」脫口而出，大受刺激之下立即遞上一紙休書。恕我持續涼血，讀到這些新聞只會得頻頻翻白眼，既然個衰人沒有洞房花燭意願，牛唔飲水唔㩒得牛頭低，真是早走早着，馬拉女還死纏爛打開什麼記招，毫無意義的「公道」討來把屁，難道戇居到期望將佢夾硬屈番轉頭？婚前不好好看清楚另一半的懵佬，更加博不到我的同情，去百貨公司買對鞋，都試過啱唔啱先至畀錢啦，就算事後可以退換或者退款，拎嚟拎去不嫌煩嗎？
類似的亂點鴛鴦譜，直界似乎屢見不鮮，可惜民間故事苦口婆心殷殷開導，目標老襯總是當耳邊風。剛剛在倫敦看中國京劇院搬演《白蛇傳》，兩個多小時的版本，交代當然不能太詳盡，遊湖後書生依約上白公館取傘，狼胎的妖婢權充媒人，三扒兩撥便推他和小姐拜堂，戲碼簡直應該叫《騙婚》。本來就優柔寡斷的男主角顯得特別窩囊，監生畀飲醉酒露出原形的蛇妻嚇死真是活該，假如阿聯酋男坐在台下，肯定會為許仙付出的昂貴代價驚出一額冷汗，深慶自己行得快好世界。教人氣結的是，死過番生的他改不掉耳朵軟惡習，法海上門講了兩句，就成功將他騎劫到金山寺，不要說護主心切的小青無名火起三千丈，舉起龍泉劍斬之而後快，事不關己的觀眾一樣咬牙切齒。