王丹同馮敬恩參加ViuTV嘅《跟住矛盾去旅行》，果然好有矛盾喎，仲搞出老屈王丹私自出席活動醜聞，不過《跟住矛盾去旅行》唔只邀請王丹同馮敬恩呢對敏感政治人物，原來佢哋仲想邀請另一對政壇死對頭去，就係喺九東立法會選舉互插嘅皇上黃洋達同快必譚得志，不過勇武嘅皇上，竟然請ViuTV食檸檬，原因竟然係怕咗快必暴力！
熱血公民黃洋達喺facebook自爆，早前獲邀參加《跟住矛盾去旅行》，而建議嘅同遊拍檔就係人力快必譚得志嘞！佢兩個曾經喺九東立會選舉論壇舉行期間推撞，不過好可惜，皇上向電視台送上大檸檬，理由係話佢同快必去旅行，可能會發生暴力事件，仲話還是不去為妙！
快必：去得成會「講獨」
一向開口埋口話勇武抗爭嘅皇上，講到快必好似暴力狂咁，唔知幾多人覺諷刺？但肯定包括快必啦，其後快必喺facebook寸爆回應，話明佢自己同好多人有矛盾，大把人可以同佢去拍《跟住矛盾去旅行》，顯然話畀皇上知，唔覺無咗皇上係損失！快必仲話呀，如果ViuTV再請，一定會去，先旨聲明會狂loop「講獨」，例如「我支持達賴喇嘛的《真相自治》」等，意在測試電視台底線，仲叫ViuTV唔使驚，強調100%嘅言論自由係要維護！
李八方
mailto:[email protected]