立法會新任主席梁君彥接任無耐，就接連受到挑戰，左報《大公報》日前用頭版「招呼」佢之後，噚日再以專欄文章發功，批評佢強硬變弱勢，不滿佢縱容辱華人士宣誓，萬箭穿心下，難得仲有人撐佢，仲要係猛人，就係前立法會主席曾鈺成（圖）！
暗撐裁決有法理依據
曾鈺成以「各方通輸」為題喺報章《am730》專欄撰文，佢話主席就有爭議問題裁決前，都要詳細說明理據、亦要全面考慮各持份者嘅意見，同時認真聽立會秘書同法律顧問嘅分析同建議，強調裁決未必符合持份者期望，但最重要係嚴格按照法律同程序作出裁決。
曾前主席又舉例話，立會主席裁定議員或官員提出嘅議案係咪可以列入議程時，依據嘅係法律同議事規則，唔可以認為議案內容不可取就拒絕納入議程，而議案應否通過，亦唔係由主席決定，要由會議經辯論後進行表決。
曾前主席長篇大論，無非想力撐梁君彥批准梁、游二人再宣誓，一定已仔細考慮法律同議事規則，亦聽晒立會法律顧問意見、仲諮詢埋外聘嘅資深大律師，已經盡晒立會主席職權，證明裁決係有充份法理依據，相信梁君彥聽到，個心都暖一暖。