豪雨成災，全城被水包圍，這晚快活谷夜馬延後15分鐘開場，以方便馬迷。
頭場五班1000米於7時30分開跑，當時天雨已停，十三少韋達同雷神莫雷拉，兩代冠軍騎師都想搶頭糊。結果雷神騎蔡約翰馬房「飛霞」放唔到，拉士幾十米俾韋達夥拍吳定強馬房「聖驛善」從後追過，「聖驛善」6.5倍贏馬，組合獨贏A1派27元。
李嘉欣丈夫許晋亨堂兄許晋義愛駒「聖驛善」今場沿途居中前位置，最終贏頸位，8歲馬打破本身接近兩年齋缽。韋達今季大打爭氣波，佢用行動證明自己年屆44歲寶刀未老，亦打破指他濕地錫身之說。計埋今次幫「聖驛善」63歲練馬師吳定強取得馬房季內第二捷，韋達已經連續四次谷草夜賽有馬贏，個人同時連勝三個賽日，並以12Win衝咗上成績表第二位。至於吳廐今季兩次贏馬都在谷草，田草同泥地均未開齋。
吳定強指「聖驛善」勝在有班底，以往三班亦勝，目前在五班當然有利，強哥又補充今場對手實力普通，也是取勝關鍵原因。
反觀雷神這晚未能延續近期食頭糊氣勢，夥拍「飛霞」屈居亞軍，三、四名分別為「你同我定」及「衝鋒友」，四重彩派7,433元。