樓市越來越熾熱，唔少人都度緊，幾時先係入市好時機。前星級地產分析員卓百德（Peter Churchouse）最近都頻頻現身，喺不同活動上分享佢對後市嘅見解。
作為樓市大好友，噚日佢出席午餐會時話，估計未來幾個月，本港樓價最少升多半成至一成，有機會升穿舊年8月高位㖭！其實卓百德上月底都講過，香港息低、失業率低，樓市好難大跌。
咁又係，當200呎富貴劏房，賣超過400萬元都有人追捧，你就知樓市有幾旺！
卓百德又話，唔相信政府短期內會「減辣」，如果樓價再升兩三成，仲有機會開徵物業利得稅或空置稅㖭呀。雖然樓價高企，但佢認為買磚頭係好嘅投資，負擔得到嘅話，為屋企人買樓都值咁話。