外號十三少的韋達第四場騎「越跑越好」轉彎喪蝕位返嚟梗頸四後，第五場三班一哩佢馬上做番齣好戲，重新接手告東尼馬房由自己贏過的「華美之寶」沿途跟前守好位，末段加速早着先鞭，加上後面馬匹發生擠碰意外，令「華美之寶」維持勁勢彈開個多馬位先過終點，爆9.7倍半冷Win捧走花旗盃，組合獨贏A2派30.5元。
韋達連同頭場勝出吳定強馬房「聖驛善」，這晚未完場已經係連續第二次賽事起孖，亦係佢今季首度於谷草起孖。
第五場大熱門係雷神座騎2.5倍「喜得福」，此駒沿途守內欄中間位置，直路中段羅理雅策「發明小子」於外叠急劇向內斜入，「喜得福」右邊內側有潘頓座騎「達羅素」貼實，左邊外側則有「發明小子」挨入大力碰撞，「喜得福」就此食正三文治，被夾至嚴重勒避失位墮退，一面倒大熱不幸泡湯跑第六。「發明小子」騎師羅理雅疑似是始作俑者。
至於「發明小子」最終影相氣走「達羅素」跑第二，「達羅素」在港初出跑谷草得第三，第四名由匆出馬「皇者拍檔」後上拎到，四重彩六萬五千幾。
「華美之寶」馬主劉英華表示，賽前對愛駒無信心，因為馬兒過往跑開1200及1400米，估唔到能夠贏出1650米，是意外驚喜，對韋達的發揮深感滿意。