浸會大學麥萃才教授創意十足，想出一個新名詞叫做「納米樓」，真係笑中有淚。香港人居住嘅樓層面積，不斷向下，最近有樓盤推出，話係上車盤喎，實用面積只有百幾平方呎，都唔知點樣放置廚房、廁所與睡床，晒士何止迷你，簡直係「納米」。
美國近年有tiny house潮流，屋仔細細，但不少係「獨立屋」，位於郊外近樹林，環境當然比香港啲高層侷促迷你樓好好多，但最大之不同，就係美國人所講之tiny house，普遍係指500平方呎以下嘅，最細嘅會細到只得80平方呎。喂，美國人住慣大屋嘅噃，有數字顯示1973年美國人嘅平均房屋面積係1780平方呎，到咗2013年增加至2662平方呎，美國人家庭人均人口數字不斷下降，但居住面積一路上升，與香港比較，差天共地。但因為收入不平均（特別係2008金融海嘯之後），又或者時興環保，不少美國人一為荷包，二為環境，索性入住tiny house！跟住一啲新派建築師就迎合或者製造潮流，在大城市設計「細屋」，巴塞隆拿有300平方呎單位，曼徹斯特出現353平方呎，德國發展出最細嘅74平方呎，係真正「納米屋」。
香港人住細單位由來已久，不過人人都希望愈住愈大間屋，但現時因應市場需求，及呎價太貴之故，新建樓盤反而愈來愈細，大家唔高興都無辦法。記得梁振英未上台，仍係測量師之時，曾不止一次公開演講，指香港嘅住屋庫存（housing stock）係以一千呎以下單位為絕大多數，超過九成，超過千七呎（美國1978年平均）嘅住宅單位，少過3%（如有錯誤，係左丁山聽後記憶有誤），當時梁振英話希望香港人可以細樓換大樓，改善居住環境。怎知道，佢成為特首之後，香港人居住面積係愈來愈細，以至有「納米屋」出現，大家唯有阿Q一啲，既然美國德國都有細於100平方呎嘅tiny house，香港都唔算太差呀！最近有年青建築師團隊設計納米樓比賽獲獎，諗出在廁所上起一個閣仔，構思新穎咁講！小G掩住個鼻話：「廁所上面點住人呀？」叫左丁山批評之，點知左丁山想唔認老話當年都唔得，對小G講：「新設計？幾十年前就係！我讀中六，考中文大學入學試之時，就係喺廁所上面嘅閣仔瞓覺嘅！」小G嚇咗一跳，唔信！對年青人講我哋年青時點樣生活艱辛，就會俾人批評過時過氣，懷緬已不存在嘅獅子山下神話，都係唔講咁多咯。