利物浦對曼聯嘅英超雙紅會，竟然安排做周一獨腳戲，相反有時周日戲碼就弱過藥煲，真係唔知英超賽會呢期搞咩。點都好，小弟一早校定鬧鐘起身睇好波，0:0嘅戰果當然令捱眼瞓嘅球迷有啲失望，不過真係睇得出摩連奴對大戰嘅部署同態度。曼聯踢成點都大把人抽水，經過周一場波，網上就流傳一個諷刺摩佬嘅笑話，話佢繼收集伊巴、普巴同月巴（唔好問我點解）後，終於有第四巴，就係大巴，用嚟取笑佢以泊大巴戰術喺晏菲路保不敗。
不過，泊大巴就係咪代表失敗？你咪叫國足泊大巴，睇吓佢哋對南韓呢啲強隊又搶唔搶到分？防守一向比進攻吃力不討好，但同樣值得尊重，曼聯周一就靠紀律性極強嘅防線，加上迪基亞嘅神勇演出拎到一分。比起其他後防，好似踢法瀟灑、有啲似里奧費迪南嘅基斯史摩寧，活動能力極強嘅戴利白蘭特或者勞基梳爾，由右翼踢到去右閘嘅路爾斯華倫西亞都算得係無名英雄。當然，曼聯球迷仲係念念不忘C朗離隊後，華倫西亞着埋C朗遺留嘅七號球衣，但因為星味麻麻，腳法亦一般所以飽受批評，但睇吓𠵱家嘅七號仔迪比，魔迷又會唔會講句「一蟹不如一蟹」？
華倫西亞打右閘都算得上半途出家，身為廠迷，小弟都要自誇吓當年雲格將羅倫由右翼改造成右閘。華倫西亞初踢呢個位都犯上出腳慢、包越位等錯誤，但慢慢累積經驗後越踢越好；大家只記得迪基亞兩次神救，其實華倫西亞下半場有球清脆鏟波，阻止咗羅拔圖法明奴單刀，都係搶分功臣之一。下周日曼聯作客車路士，摩連奴倒戈會唔會再泊大巴就未知，但相信華倫西亞繼續係紅魔後防重要一員。
文：牽牛