建築、測量、都市規劃及園境界議員姚松炎上星期喺立法會宣誓時誓詞加咗料，多咗「定當守護香港制度公義，爭取真普選，為香港的可持續發展服務」，俾秘書長陳維安裁定宣誓無效，噚日要再宣誓。
姚松炎噚日朝早緊接喺因為講漏「香港」兩隻字嘅民建聯黃定光之後宣誓，今次佢就讀晒誓詞冇加任何字句，順利完成宣誓，但喺佢之後嘅梁頌恆、游蕙禎同劉小麗就因為建制派發動流會而未能宣誓。姚松炎之後同非建制派議員一齊開記者會譴責建制派，點知佢無啦啦戴住副黑超，唔通宣完誓做咗議員就即刻「寸神」上身擺款？
可能姚松炎都驚大家誤會，所以發言時第一時間澄清，話自己因為右眼發炎所以先至室內戴黑超，特別同大家講聲唔好意思喎。