喺建制陣營中算異類、有時持相反意見嘅謝偉俊，其實算係宣誓流會風波嘅先鋒，周一率先公開建議除非梁、游宣誓前道歉否則建制派集體離場。查實呢位西環大契當日提建議時，俾梁美芬同何君堯等潑冷水，點知大家噚日齊齊歸隊；官媒新華社其後讚「愛國愛港」議員集體離場，阻止辱國議員宣誓，法律超人似乎對阿爺有超乎常人嘅理解力！
據聞有建制派一早聽聞流會建議，但驚玩得太大，估唔到俾謝偉俊搶閘建議。謝偉俊話當時唔知政府會提司法覆核，但又會咁啱建議11月3日開審前嘅會議玩流會？佢話畀三次機會梁游考慮道歉好正常，所以先咁建議喎。但建制派流會後拉大隊見記者，謝偉俊只靠邊站；唔通低調先係生存之道，定其他人唔想畀非一般建制派邀功？