雷神莫雷拉不愧贏馬機器，頭場輸完大熱門蔡約翰馬房「飛霞」，事隔半粒鐘，佢就於第二場五班1800米，夥拍同樣大熱練馬師蘇偉賢的「識飛」贏馬補數，個人連續第五次賽事勝出第二場之餘，更為「識飛」打開在港勝門，單Win及組合獨贏A1分別派23.5及17元。
四歲愛爾蘭自購馬「識飛」連同這晚今季三仗均由雷神操刀，名次越來越前，這晚加程跑1800米排1檔，沿途貼欄守好位一步不蝕，末段順勢望空加速上前，決勝階段追過埋一度突圍的史卓豐座騎「大寶庫」，贏個半馬位，蘇偉賢連勝三個賽日冇斷纜。「識飛」今早進行加課操練，在沙田內圈操後大發脾氣拋下策騎員，走甩狂奔一輪，或是狀態過勇所致，最後被捉回驗過無恙，今晚照跑並勝出。
蘇偉賢表示十分感謝馬主肯给予耐性，此馬近數仗都很失運，尤其上仗排外檔被頂出大外叠，落第十分不值，幸而莫雷拉仍然不放手，繼續為此馬主㘘。蘇偉賢認為「識飛」是北半球馬，下雨場地起變化有利，而且可以應付千八米或以上途程。
呢場最低班賽事前四名有熱有冷，二至四名順序為「大寶庫」、「永常勝」及「鼓浪飛星」，四重彩派一萬二千幾。