嚟緊呢輪英超，車路士下周日主場對曼聯，意式三中堅同摩式大巴陣相遇，希望唔會悶親大家啦！車路士最近兩場改用三中堅，防守即刻唔同晒，小弟覺得陣式轉變事小，最緊要係跑動積極咗。用人方面，最估唔到係域陀摩西斯竟然搵到條生路，喺右翼衞踢到生龍活虎。
小弟好耐之前聽過摩西斯嘅大名，因為佢入選各級英格蘭青年國家隊，細個嗰陣踢前鋒，係咁入波，都被視為英軍新希望，我以前打機玩《FM》都買過佢。當佢出道之後踢翼鋒，畀我感覺就係個技術弱化但身體強化版嘅禾確特，腳法一般，但勝在快，可以衝吓跑吓。佢喺2012年去咗車路士，嗰陣車仔係咁搜刮各路新星，例如奇雲迪布尼、盧卡古咁，培養未來班底。不過，迪布尼同盧卡古喺外借期間表現非常好，所以等唔到喺車仔上位就俾人撬走咗；所以刻薄啲講句，摩西斯今日上到位，好大程度係佢近幾年外借利物浦、史篤城等踢得麻麻，冇買家要。
車仔舊年同摩西斯續約，但都再借佢去韋斯咸，同埋佢今年已經25歲，真係冇乜潛力可以再被發掘出嚟。諗住摩西斯會繼續做人球，做多一兩年就轉去踢英冠嗰陣，佢遇到干地。真係幾佩服干地嘅用人，諗住佢轉踢3-4-3，首選右翼衞應該係艾斯派古達，但佢竟然用艾斯派古達做中堅，摩西斯就踢翼衞；呢對右路組合近兩場踢得好好，唔單止冇失波，摩西斯上場仲有入波。摩西斯技術上冇夏薩特嗰啲咁好，但勝在跑得同肯跑，用勤力搏取干地歡心。喺呢個講求跑動嘅年代，呢種腳法麻麻但肯跑肯搏嘅球員好受歡迎，例如曼聯嘅路爾斯華倫西亞同利物浦嘅占士米拿。
文：咖喱