我求大俠帶大家認識一個「龘」字，就係三個龍加埋一齊，解作神龍騰飛；而呢個字亦可以總括今日呢篇文。卡斯柏舒米高、保方同洛里斯喺周二歐聯都有神龍級表現，飛身騰空救波，幫球隊搶分，其中卡斯柏喺下半場幫李斯特城守住勝局，主場以1:0贏咗哥本哈根，歐聯三連勝得九分，仲高分過聯賽。
舒米高歐聯未失一球
李斯特城上場英超被車仔大炒，但歐聯就發威，上半場由馬列斯建功，領先1:0。哥本哈根換邊後反撲，卡斯柏開始忙，救得最靚嗰球喺89分鐘，哥軍嘅辛坦達亞傳中，哥利尼斯喺12碼點立即掃射，卡斯柏落地極快撲出，幫李城保住贏1:0。李城喺歐聯G組以九分排榜首，晉級16強機會高唱入雲。
李城嘅歐聯積分家陣仲高過聯賽，今季喺英超踢咗八場都係得八分排13位。最難得嘅係，李城三場歐聯都未失過波，但係領隊雲尼亞里就唔多開心：「一方面我覺得自豪，另一方面我好憤怒，但諗一諗其實都正常嘅，第一次踢歐聯大賽，返到聯賽就好易輸波。呢個係心理問題多啲，我希望可以改變呢種情況。」
保方、洛里斯神級演出
講神勇門將，點可以唔提祖雲達斯嘅保方，呢場佢真係穩如泰山，用表現去穩定軍心。喺H組作客里昂，祖記喺35分鐘輸12碼，拿卡錫迪操刀，被保方捉到路撲出。50分鐘，里昂嘅費基亞禁區內轉身一射，冇腳影捉，但保方都救到，技驚四座。54分鐘，祖記中場勒美拿被逐，10人應戰，陷於劣勢，如果呢個時候再失波嘅話就大勢已去，但保方用一己之力保住後方，哥倫天杜利素嘅近門頭槌都被佢撲到。全靠保方嘅銅牆鐵壁，祖記終於捱到去76分鐘由古達度破門，險勝1:0完場。保方之前代表意大利對西班牙嗰陣派膠，有人話保方已經老嘞，佢喺賽後話：「你哋可以幫我嘅職業生涯舉行葬禮，但冇人會喺入面。」
E組嘅熱刺都有神龍，就係洛里斯，佢哋作客利華古遜，受制對手逼搶，如果唔係有洛里斯，應該都輸咗。洛里斯喺下半場救到球靚波，對手查維亞靴南迪斯近門一射，佢飛身落地，喺白界上撳得住個波，先幫熱刺保住一分，兩隊踢成0:0。