跟「紅籌之父」梁伯韜同期嘅資深ibanker高寶明（Alex）上月初去咗民信金控（273）做話事人，轉頭搵來世茂房地產（813）主席許榮茂斥資7億元入股做第二大股東，噚日再宣佈，有份投資嘅內地證券公司「申港證券」正式喺上海開業。
申港證券係首家根據CEPA補充協議框架，而設立嘅中港合資多牌照證券公司，可以做股票、資產管理、包銷等業務，註冊資本35億人仔。民信金控係申港證券第一大股東，持股15%，其餘權益由13名中港股東持有。
市場盛傳，年近60嘅高寶明今次去民信，係諗住食大茶飯，背後有一班高人支持，而呢班高人幾年前沾手過一宗大收購，可惜無功而還，家陣捲土重來，不過傳聞歸傳聞，散戶做投資決定都係自己做功課先喇。