乜嘢叫屋漏兼逢連夜雨？立法會秘書長陳維安應該好清楚。上星期三無論係新一屆議員宣誓定係選舉主席規程，都搞到秘書處暈陀陀；點知一星期以後，輪到特區政府同建制派玩嘢，前者入稟禁止兩議員宣誓，後者就策動流會配合，各派陣營每次大會都有唔同玩法，秘書長點樣應對都要諗吓妙法。
點知喺呢個頭痕痕之際，連個天都唔幫立法會，噚日嘅黑色暴雨警告下，立法會都頂唔順嘞，會議廳竟然漏水喎，職員就攞咗啲A4紙鋪喺漏水嘅地方頂住檔先，仲唔係禍不單行？又咁講喎，如果當時仲開緊大會，睇怕都會滴到班議員，唔通呢個就係噚日流會嘅另類收穫？秘書處回應，工作人員噚日下午發現會議廳天花板有滴水情況，建築署已經跟進緊喇。