大家都會記得，國務院港澳辦主任王光亞講過，做特首要有三大條件：愛國愛港、有高度管治能力搞好香港經濟同民生，以及有較高認受性。而當年今日嘅佢，仲講過肺腑之言：「人選在你們（香港人）手裏，不在我手裏。」
689今時今日民望低
真係有啲咁嘅事？大家睇番梁特，佢似乎係愛國愛黨多過愛國愛港，係咪有能力搞好經濟同民生？相信商界以致基層都唔多同意。而有較高認受性呢，當年的確係嘅，因為當年一眾疑似跑馬仔人選中，佢係民望最高嗰個，今時今日就唔同晒咯。
又講真吖，特首人選梗係唔喺王光亞手上啦，因為真正話事人係阿爺吖嘛，當年揀特首，阿爺明顯真係有睇民意，但相信四年落嚟，阿爺都應該知道，民意如浮雲，非常唔穩陣。如果要王主任再列新一屆特首三大條件，唔知係邊幾點？