新一屆立法會開鑼只不過一個星期，已經鑊鑊新鮮鑊鑊甘，每日都有新奇事發生，以後四年係咪咁樣日日戰鬥？八方冇水晶球，好難有答案在手，但好肯定噚日嘅事務委員會選舉翻天覆地，肯定係史無前例。
查實噚日唔少事務委員會開會期間，都有議員爭拗規程問題，最終幾個更加被拖垮，無法按原定計劃選主席；唔知係咪爭拗過程好睇過正經開會，八方現場所見，唔少議員索性攞手機出嚟做facebook直播，又或者拍片記低呢個時刻，好似保安panel開會時，民建聯陳恒鑌同葛珮帆都變身拍友，熱血公民鄭松泰等亦攞起手機錄影，點知謝偉俊卻竟然做「架樑」，無厘頭鬧泰博話唔應該錄喎，此時劉小麗幫拖出頭，叫謝偉俊若要鬧人，唔該鬧咗建制派先！
估唔到拍片都會鬧出風波？喺呢屆無奇不有嘅議會，相信各種小學雞事件都會陸續有嚟。