特首梁振英認真好波，「備選」期間不時唔喺香港都選到，講緊嘅係5年前呢段時間，佢去完山東接受名譽學位後，隨即又到英國倫敦出席囝囝嘅畢業禮，但即使佢身不在港，一樣可以鬧到滿城風雨。
當年今日出版嘅《東周刊》報道，梁特做城大校董會主席時行高壓管治，就算佢有意緩和關係，最終都不歡而散。就喺呢個時候，中大學者蔡子強加入戰團，撰文話擔心俾梁特咁嘅人做到特首就會「整人」，據報蔡子強嘅文章出街後，有人即刻傳召城大高層返學校開會，傾吓點樣反擊蔡子強，而城大當時回覆話，校政唔係梁特個人決定。
八方睇番呢段歷史，忽然記起梁特夫人梁唐青儀，2014年曾以冷血、涼薄、刻毒等字眼，大鬧曾就齊昕事件撰文嘅蔡子強，唔通呢段嫌隙，5年前已經出現？