每次消委會check嘢，巿民都提心吊膽，今次輪到每個小朋友都一定有嘅擦紙膠喇！消委會以台灣做標準，檢測咗市面上25款擦膠，發現超過一半樣本所含的塑化劑超標，於是提醒家長唔好畀小朋友咬、舔或者吮擦膠。
消委會檢測嘅25款擦膠當中，有一款完全沒有檢驗出塑化劑，就係施德樓Mars Plastic Eraser白色擦膠。消息一出，巿面上嘅深藍Mars擦膠隨即被搶購一空！查實施德樓的Radar型號喺塑化劑超標名單中亦榜上有名。
讀者沈太見到新聞，今日（18日）就立即去到油麻地教協，見到文具架啲施德樓Mars擦膠冇晒，問問職員，發現入咗嘅幾百嚿一朝被買清，最後死搵難搵先喺倉底搵到兩粒畀佢咁話！
家長緊張都理解嘅，但係其實只要教好小朋友唔好食擦膠已經冇問題；仲有，就係寫少啲錯字，咪可以用少啲擦膠囉。
記者：容慧心
