特首梁振英去年諮詢社民連「長毛」梁國雄對施政報告意見時，因為不滿長毛讀出要求佢交代UGL事件等問題嘅信件，即場下令警察將長毛逐出會議廳。事隔一年，梁振英噚日再次諮詢泛民議員，但一眾民主派議員全部甩底，最終得長毛一人對住CY同近十名官員。
長毛會後話一開波即刻同CY講土地問題，對方聽到佢話支持雙辣招時面露笑容，但當長毛批評佢錯誤開發土地、解決唔到港人居住問題時，即場木嘴。當長毛攞番去年封信出嚟諗住再讀時，CY即刻問「係咪舊年嗰啲嘢?」聽到長毛話「係」之後，CY即刻收起面前嘅筆同簿，黑面離場，佢話現場官員睇到都好錯愕，本來繼續坐低嘅都喺CY手勢示意下離開。
加送《成報》頭版
長毛本來諗住送份用《成報》頭版製成嘅「施政報告」畀CY，因為「最奇怪係梁振英走去告《蘋果》，但就當《成報》喺火星」，點知CY走咗去，反映佢心胸狹窄、小器無品。原來佢一度想將呢本「施政報告」送畀特首辦主任邱騰華，對方見到就笑住話：「唔關我事㗎！」