蘋果公司嘅電動車今次真係「死火」了。市傳公司將成個Project Titan計劃摺咗，唔知蘋果公司係咪怕咗Tesla，咁啱遇着剛剛，外號「鐵甲奇俠」嘅馬斯克極速發文抽水，話公司將有新產品登場，等星期三開估。
蘋果公司研發電動車計劃傳咗兩年幾，原定2019或2020年面世，點知傳出難產消息，真令人意外。
彭博爆料話，蘋果公司早兩個月將120位電動車軟件開發工程師炒魷，硬件工程師亦冇得留低。原本過千人嘅Project Titan團隊員工買少見少，只剩幾百人。
Tesla創辦人馬斯克見對手似有麻煩，仲唔踩油幫自己公司造勢咩。馬斯克喺Twitter發文話，為精益求精，公司將於星期三公佈新產品，畀個驚喜大家咁話喎。