上一屆立法會民望最高嘅議員係主席曾鈺成，唔知曾鈺成卸任後，新一屆邊個評分最高？港大民意研究計劃最新嘅調查顯示，十大議員中以民主黨超級區議員涂謹申排榜首，獲57.3分，係佢繼2014年10月後再次排第一，第二同第三係新界西兩大陣營嘅票王，依次係朱凱廸嘅56.5分同新民黨田北辰嘅53.9分。連同排第七同九嘅香港眾志羅冠聰同青年新政的游蕙禎，有三位自決派殺入十大。
三自決派上榜
涂謹申成日為苦主出頭、朱凱廸揭開橫洲黑幕，田二少就係建制派罕有較開明人士，獲市民畀高分都唔出奇。至於排第四有48.7分嘅民建聯主席李慧琼，有咩賣點？可能係最大建制黨阿頭啩，至於新民黨主席葉劉淑儀就以48.4分排琼子之後。人民力量陳志全同社民連梁國雄，分別排第六同八；啱啱掹車邊入到第十嘅則係民建聯新丁周浩鼎。
結果有啲意外？查實呢個調查分兩階段進行，首階段喺9月訪問510位市民，要被訪者講出10名最認識嘅立法會議員，而獲提名次數最多嘅12名議員喺10月再進行次輪調查，由1,004名受訪市民評分。所以先要過到第一關先至上到榜。
而以熟悉度嚟計，其實有5名新丁入到頭12名㗎，但民主黨鄺俊宇同劉小麗就不入十大。八方反而奇怪，一席都冇嘅公民黨，署理黨魁楊岳橋都幾受歡迎㗎，竟然上唔到榜？岳少對此冇乜所謂，一貫鬼馬笑住回應：「人生總係充滿住遺憾！」
李八方
mailto:[email protected]