港男揚威海外！喺摩納哥舉行嘅定期啤牌錦標賽「Big One for One Drop」，喺加拿大出生嘅港人Elton Tsang擊敗25名對手獲冠軍，奪得11,111,111歐元獎金、即係9,400多萬港元。根據《PokerNews》報道指，Elton今次贏得啤牌界歷史上第三高獎金。
比賽主賽喺摩納哥嘅蒙特卡羅大賭場舉行，參賽金都要成一百萬歐元，喺摩納哥時間本周日（16日）舉行總決賽。Elton同與來自美國、英國同加拿大等地選手對決後，最終擊敗俄羅斯對手勇奪冠軍。
據報Elton Tsang係一名商人，投資業務包括旅行社、資訊科技業、同互聯網業。佢喺啤牌界係活躍分子，一直有參與國際啤牌賽；2010年更喺《亞洲撲克王大賽》擊敗233位參賽者，捧走逾55萬港幣獎金。