【爆相爆片】搞續牌企正隔籬
人妻洪欣唔認得林德信

本月初45歲牛一嘅人妻洪欣，同31歲嘅林子祥囝囝、男神林德信唔同年代入行，兩人冇合作過，唔識真係唔出奇。所以日前佢哋同時喺金鐘嘅運輸署撞到，雖然企正隔籬，但大家招呼都冇打，視而不見。

擦身而過

讀者鍾小姐透過本報「爆相爆片」，分享佢日前影到素顏嘅洪欣喺金鐘嘅運輸署搞續牌，佢同林德信只係有一個身位距離，但洪欣似乎認唔出呢位後輩，兩人完全零交流。鍾小姐話佢哋各自各喺度排隊等續牌，等咗一陣就輪到洪欣，但係唔知佢係咪有啲文件未準備好，所以轉個頭佢喺側邊密密填，跟住到林德信去窗口辦手續，不過洪欣仍然未搞掂，佢哋兩人最後只係擦身而過。
當時洪欣身上條連身裙有啲縐，搞到佢個樣有啲攰，不過佢自從同現任丈夫張峰丹生咗囡囡張晞彤後，就專心湊女，有時又做柴可夫接送小朋友，續牌都好緊要㗎。