邊位球迷捱眼瞓睇晒禮拜一深夜場英超「雙紅會」請舉手！我求大俠要為你哋對足球嘅熱誠致敬。曼聯今季集齊普巴同伊巴，但係摩連奴喺晏菲路泊大巴，全場龜縮死守利物浦，而紅軍亦冇乜計仔，難得起到腳射門都過唔到迪基亞，最後呢場好似安眠藥嘅比賽以0:0完場。
摩佬棄控球死守一分
一睇個陣都知摩連奴諗住泊大巴，搵費蘭尼同安達靴里拉踢雙防中，左翼係近年成日踢閘嘅艾舒利楊格，進攻就靠晒保羅普巴、伊巴謙莫域同拉舒福特。曼聯擺明放棄控球，縮喺後面等利物浦攻，上半場真係啱晒失眠嘅朋友睇，兩隊搶完又交失，搵腳精采埋門都難。換邊後形勢冇變，係得兩腳射門叫做提一提神，利物浦嘅安利簡恩喺58分鐘殺入禁區近射，但曼聯門將迪基亞落地超快撲出；70分鐘，菲臘比古天奴喺禁區外施展招牌遠射，睇住個波應該彎入網嗰陣，迪基亞飛身一撲，神救呀！將個波托出底線！到尾段，摩連奴換走拉舒福特，換入埋「月巴」朗尼，三巴齊集加強架大巴，最後摩連奴求和得和，同紅軍踢成0:0。
如果目標係死守攞一分，曼聯呢場真係攞滿分，雖然得35%控球，中目標射門僅得一腳，但佢哋可以令到對手都啞火，紅軍得三腳中龍。除咗迪基亞，靴里拉、華西、楊格同費蘭尼好搶鏡，防守數據贏晒（見附表），但就難為一班諗住雙紅會好刺激所以捱夜睇波嘅朋友。賽後摩連奴心情唔錯，幾滿意喺死亡賽程嘅第一場有一分落袋，「我哋喺戰術上控制咗比賽，今場利物浦有65%控球但得兩腳有威脅射門，你應該去質疑佢哋，係佢哋有問題而唔係我。」曼聯之後會對費倫巴治、車路士同曼城。至於利物浦領隊高路普就唔滿意賽果，話球隊踢唔出應有嘅攻力。