靚女「傘兵」、灣仔大坑區議員楊雪盈，BB時期已經眼仔睩睩好得意，30歲嘅佢記得細個最鍾意攞起紙就畫，同埋睇卡通片，兒時想大個做「魔法公主」，因為可以幫到好多人，兼變走其他人嘅唔開心事，查實同佢𠵱家做區議員嘅目標都幾一致。
兒時最愛刨通勝族譜
甚有文青氣息嘅雪盈BB，朗誦、唱歌都好叻，除咗BB仔時已被父母話佢未識叫人先識唱歌，更由小學二年班開始參加學校合唱團，到大學都未停過，話最享受一班人一齊努力去做好一件事嘅感覺。
除咗唱得，雪盈BB做功課亦好快手，小學已經好鍾意睇書，兒時最愛睇通勝同自己嘅家族族譜（好另類下喎！），佢仲喺小學最後一年刨晒校內圖書館嘅書，連字典都唔放過，難怪中大藝術系畢業嘅佢笑言如果唔係讀藝術，應該去咗讀語文。
中學讀九龍文理書院，幫過學生會做聖誕party司儀，𠵱家每年都返母校探訪。而佢嘅藝術天份到咗大學時充份發揮，大學時一直兼職教細路仔畫畫，之後做埋中大專業進修學院文化管理系講師。當選區議員後，佢嘅書法天份亦大派用場，喺請願橫額上親筆寫字，將嗜好變成抗爭一部份。
