「絕對勝つ ま す（絕對會贏的）！」香港女車神李慧詩（Sarah）月初喺新潟縣彌彥贏到第一個日本凱林賽冠軍之後，就喺接受大會訪問嘅時候用日文向車迷發出宣言，話下站喺山口縣防府嘅賽事絕對會贏，結果Sarah不負眾望，周一又發揮超班嘅實力，贏得日本賽事嘅第二個冠軍（每日體育盃）。
那邊廂Sarah嘅勁敵澳洲33歲車手美雅絲日前宣佈退役，但身處日本嘅Sarah一於好少理，仲喺個人facebook上載一張影住菲林相機嘅相片，話將會度過一星期冇電話嘅原始世界，相信Sarah一邊希望可以專心面對比賽，一邊可以享受用菲林相機影相嘅樂趣。里約奧運後休息咗兩星期嘅Sarah，就帶住《日語300句》學識幾句嘅日文去到日本比賽一個幾月，希望喺當地生活嘅時候用得上，結果真係喺訪問嘅時候大派用場，雖然就講得唔太流暢，不過都勉強講到「好鍾意大家」，梗係冧到唔少日本車迷。
贏里奧對手蘇妮雲
忘記里奧炒車嘅經歷，Sarah喺防府站頭兩日嘅小組預賽，都輕鬆贏對手幾個車位入決賽。嚟到周一鬥五圈共1,682米嘅決賽，同組有七位車手，Sarah最大嘅對手當然喺同樣有參加今屆里約奧運嘅加拿大車手蘇妮雲。
今仗Sarah係咁多位車手起步最慢嘅一個，不過佢好快就搵到有利位置，緊隨排第一嘅蘇妮雲。到最後一圈半雖然有兩位日本車手由外邊突圍，令Sarah一下子變成第四位。不過見慣大場面嘅Sarah，等到最後一圈先加速，一口氣超過三位車手首先衝線，繼彌彥站之後又贏日本賽冠軍；而後勁不繼嘅蘇妮雲僅得季軍。
下周日轉戰川崎站
再贏一站冠軍嘅Sarah，其後仲得到唔少日本網民喺網上發文讚佢好犀利㖭。佢賽後繼續用有限嘅日文接受大會訪問：「𠵱家心情好興奮，可以得到公仔做禮物好開心。」Sarah仲話原本以為可以踩「雨戰」，可惜最後都喺冇落雨令佢有啲失望。做到賽前「絕對要贏」承諾嘅Sarah，下周日就會轉戰神奈川縣川崎站嘅賽事，同場最大對手會有英國車手瑪珍。