恒指似乎按劇本走弱，最近幾個交易日每逢跌至23000點就有好友出嚟頂，就咁睇法即使今次唔跌穿，之後反彈過後都一樣要穿。
雖說恒指周線圖穿頭破腳嘅往績太可怕，半年內隨時要跌2,000點或以上，但7月升市以嚟未見得有大量散戶亢奮入市，嚟緊佢哋便冇貨可驚青拋售，相反沽貨嘅會係大戶為主。
話明大戶，一定懂得冷靜咁沽貨，因此相信下一轉跌市會較有秩序、反覆咁跌，而非直線下跌，即係一反彈有人追就見頂掉頭，跌到驚就自然反彈，慢跌得嚟要玩謝大家，順便讓大戶中間食埋波幅。閣下短期內要買股賺錢，難，因為要比大戶更冷靜。
星期一港股有逾千股下跌，煤炭股、油氣設備股相對強勢。煤炭股受惠近期動力煤價格接連破頂，另外，提煉金屬用嘅焦炭價格亦都上漲，國際油價都偏強，呢批強勢商品偏向同民生消費相關度高，加上人民幣走弱，隨時令中國進口商品加劇而輸入通脹。值得注意係剛剛內地公佈9月CPI按年升1.9%，遠高過預期，PPI更加係4年半以來首度增長，小心呢個並非單純經濟好轉訊號，未來大家唔係驚通縮，隨時變成驚通脹。究竟呢一輪通脹殺到，同過往有乜唔同？係危定係機？下期再續。
晉佳
http://fb.com/advanceguy1