「抽水大王」官永義睇中咗港交所（388）喎。佢旗下永義國際（1218）噚日公佈，過去兩星期（本月5至12日）拎咗超過7,400萬元，喺孖屐掃入港交所股票，平均價207.09元，可惜港交所唔聽話，跟住大市係咁跌，噚日收報203.4元，永義賬面輸緊130萬元左右。
其實永義一直幾鍾意港交所，之前主要買港交所嘅股票掛鈎票據（ELN），每次買為期兩個月嘅ELN合約，2,000萬至5,000萬元不等，今次直情掃入股票，按散戶智慧，𠵱家買港交所多數諗住下個月深港通開通，有大茶飯食喇，可惜暫時未見官先打八十。
根據永義年報，截至今年3月底，永義持有買賣證券逾6,400萬元，不過公司持有現金只得1,233萬元，反而銀行借貸就有9億元，即係點呢？投資者要自己參透了。