東盈控股（2113）噚日掛牌，公司英文名係CHerish Holdings Limited，「CH」故意大楷。主席鄧民安解釋，因為鄧夫人（執董蔡俊芝、Choi Chun Chi）芳名好多「CH」，「CH好好，乜都好」，所以公司名都沿用「CH」囉。
見鄧生外型咁老實，估唔到佢同劉青雲一樣，都幾識𠱁老婆，老婆係用嚟cherish（珍惜）吖嘛。東盈首日已經升14.3%，以主板建築股嚟講算唔錯。
講開又講，呢期上市嘅公司都非常低調，上市前又唔開記者會、順利上埋市都唔肯見記者嘅，唔止東盈控股，同日上市嘅浩德控股（8149）、創建集團（1609）都係咁，又會咁怕醜嘅？
其實上得市就應該面對投資大眾，透明度高啲亦不為過，始終集資得嚟嘅都係公眾錢。唔通中環花生友講得啱，上市前已經鋪好路，根本唔使理公眾投資者？