【跑馬地】外號「木嘴」嘅前香港足球先生顧錦輝，雖然掛咗靴好耐，不過依然冇離開過足球圈，𠵱家喺南華做緊助教，平時會唔會都買吓波就唔知喇，不過前日喺沙田馬場有11場馬跑，就見到顧錦輝喺跑馬地其中一間投注站出現，賽事由中午12點半開始，不過佢成4點幾至行入投注站。
邊行邊度飛
以前喺球場上英姿颯颯嘅木嘴，55歲人到中年，頭髮變得稀疏咗，條腰亦變粗咗好多，街坊裝一度，一手攞住份馬經，一手揸住支筆，一副麻甩樣，邊行邊度飛，耷低頭好投入咁做功課，然後走咗入投注站。入到去亦冇心急落注，而係追吓啲賠率變化先，之後就埋頭苦幹，金睛火眼刨馬經，但似乎冇乜嘢心水，由於時間唔等人，所以最後急急腳行去櫃枱落注，不過落完注個樣都係好冇信心咁，再皺晒眉刨報紙，仲一臉迷茫行出投注站，坐車離開。
唔緊要，就算唔中都仲有發達機會㗎！今日馬會開始接受萬聖節金多寶投注，估計頭獎基金係8,000萬元，到時投注站又會大排長龍，木嘴又可以碰吓運氣喇！
撰文：馮仁昭
