雷神莫雷拉近兩戰喪贏9Win，真係威到冇朋友，本周三（19日）佢又騎足8場，係咪又會出現「一個人的馬場」嘅情況？咁又未必喎！因為睇睇雷神座騎陣容，8駒中只得「喜得福」上仗上名跑第三，同上周三雷神坐擁8隻上仗非冠即亞之馬，結果狂掃5Win比較，今次雷神戰馬嘅質量無疑遜一籌。
咁既然雷神啲馬有瑕疵，騎師王邊個更值捧場呢？小鮮肉史卓豐就務必要重視，一來佢係繼雷神以外，本周三僅有兩位騎足8場嘅騎師其中之一，二來豐豐啲馬的確唔錯，「大寶庫」、「明多多」都係新勝分子；「勝利名星」則今季3戰非冠即位，4歲馬大熟大勇；而「步步領先」上仗亦得季軍，狀態有保證。
其中「大寶庫」原於前周三在勝途谷草五班1800米爭連捷，但因馬主鄭家純丁父憂退出，隔兩周立即安排跑今仗同班同程，擺明幕後不想浪費牠這一輪勇態。今朝豐豐亦親操「大寶庫」，走勢相當對辦，看來隻馬可以為豐豐喺騎師王增添分數。