月光光，照地堂，蝦仔你乖乖瞓落床……Sorry，一聽到「月光光」呢3個字，一時又感觸而至……點解要提「月光光」？原來又關特首跑馬仔事，皆因早前有傳言話，政務司司長林鄭月娥會同佢嘅「心腹」，包括行政會議召集人林煥光同扶貧委員會成員羅致光，以「月光光」組合出戰特首，難怪惹嚟各方注視。
葉劉傳埋一份
係咪大家多心，噏得就噏？當新民黨主席、即係另一疑似有心跑馬仔嘅葉劉淑儀，早前喺電台節目都引述有傳聞話呢個「月光光」組合蓄勢待發等入閘，令傳聞更添可信性，越傳仲越盛噃！
之不過當事人之一嘅羅致光，噚日朝早就喺電台節目否認有關說法，但否認之餘，都大讚呢個說法好有創意，「事實不存在所謂組合。創意分數相當之高；由零創造一個咁嘅名稱，都幾有趣」。被外界視為林鄭愛將嘅羅致光不諱言，香港確實有呢3個「月光光」，但睇唔到會成為組合，自揭同林鄭工作上有來往外，同另一個光就冇乜，3人為公事一齊出現，都係一千零一次。羅強調由傳媒報道睇到，林鄭好希望完成佢嘅政務司長任期，暗示對方唔會參選。睇返林鄭噚日出席「鼠戰中環」活動致辭時，表明下年想放低公職身份落場玩，似乎想講明年無官一身輕。
但上屆選戰嘅啟示係，一表態就有可能招致抹黑之禍，所以政界中人都話，唔會盡信林鄭冇做香港首位女特首嘅野心，況且政治一日都嫌長，加上成日要「大局為重」，大家都係剝住花生，等選委會大局已定先至買定離手。
李八方
mailto:[email protected]