體壇拾趣：
破11年大賽盲門梁文博high爆

中國桌球壇唔只得丁俊暉！梁文博喺周日舉行嘅英格蘭桌球大師賽決賽以9:6擊敗東道主球手鄧立普，職業生涯首次贏得大型排名賽冠軍，仲收到七萬鎊（約66萬港元）嘅獎金，世界排名更創新高升上第12位。

贏鄧立普激動到喊

平時講起亞洲嘅桌球手，大家多數都會諗起港將傅家俊，又或者係中國嘅「小丁」丁俊暉，但其實梁文博都出咗道11年，仲曾經兩度打入大型排名賽嘅決賽，包括09年上海大師賽同上年嘅英錦賽，可惜兩次都屈居亞軍，所以就冇咁出名。難怪梁文博喺今場贏咗鄧立普之後會激動到喊，佢仲話：「我真係好開心，我今個禮拜嘅表現好好，我好享受每一場比賽。」梁文博仲大爆「火箭」奧蘇利雲喺賽前向佢教路，所以佢先可以打得咁好。
世界桌球聯會喺今年仲有一項新獎勵，假如有球手可以喺英格蘭、北愛爾蘭、蘇格蘭、威爾斯呢四站「英國本土排名賽」連奪四冠嘅話，咁就可以額外贏得100萬鎊（約946萬港元）獎金。梁文博作為唯一一位有機會贏呢100萬鎊嘅球手，佢就話自己唔會諗太多，只會盡力打好每一場波。