與旅遊T講旅遊好去處，左丁山聽到冇晒開工mood，一味掛住去旅行，突然間聽見旅遊T講政治，當堂夢醒，因為旅遊T竟然識得黃之鋒呢位後生仔，對佢呢位一年有一半時間在外地嘅老闆嚟講，點會關心黃之鋒㗎，佢自己都不時係政府高官嘅座上客噃。
旅遊T話：「香港人有錢，鍾意旅遊，喜歡高級豪華嘅，可以搵我，喜歡便宜夾大件嘅，可以跟旅行團，正是豐儉由人，但有一個大前提，就係香港人有充份旅行自由，揸住本特區護照可以周圍去。但黃之鋒被泰國拒絕入境、遣返，令我地發覺原來旅行係可以俾中央隨時叫停嘅噃，外國係聽中國外交部說話嘅噃，我地嘅旅行自由可能因言論而受限制，幾得人驚呀！」
講到咁嚴肅，旅遊夢即刻冇咗，左丁山講：「袁司長話泰國總理唔係講收到中國知會嘅，係香港人繙譯泰文錯誤啫！」旅遊T還未反應，旁邊已有編導C搶答：「讀過香港大學法律學院嘅人，好唔應該講一啲自己都唔信嘅說話！」唔，是否如此，要由香港大學法律學院校友去說明。左丁山之泰國朋友就好簡單咁同左丁山講過：「Our Premier did say that！」
旅遊T做旅遊生意，關心關注香港人持特區護照之旅行自由，十分自然，佢又話：「以前有客人問我去旅行持特區護照好還是揸舊BNO護照好，我話特區護照好方便，歐盟通行。但見過黃之鋒事件後，唔敢咁樣答咯，有BNO嘅，繼續用啦。」
編導C話黃之鋒事件咁掃興，不如介紹吓又平又正嘅旅程啦，旅遊T即刻介紹秋季萊茵河之旅，時屬旅遊淡季，遊船河價錢特平，天氣又未太凍，人少啲在船上更寫意，而且郵船每去到一個城市就供應該地飲食，次次不同，包保滿意。唉吔，依家咪係時候囉，但臨時點樣向公司攞假呀！編導C唯有安慰自己，明年早啲安排。
拜拜之後，有老友記打電話來問，一個小型組織趁熱鬧，想搞一個一帶旅行團，去哈薩克斯坦、烏茲別克等地方，旅遊兼考察，算係響應政府大力推介一帶一路之舉，叫左丁山幫手搵間相熟旅行社帶路，即刻急call旅遊T，以為俾生意佢做，點知佢話：「完全無興趣，收你三萬元一位都係捱義氣，在哈薩克斯坦食餐靚嘢，幾乎一萬港元，我公司冇興趣去一帶國家開拓生意呀。」哦，一帶之旅遊商機，原來現時仲係大隻講。
（按：得新亞書院校董黃經國先生安排，香港拳王曹星如今晚７時到新亞圓形廣場與師生校友分享他的擂台生涯。主講題目：擊倒挫折，敢想敢做──尋夢、追夢、圓夢。歡迎校友出席）