雖則卸下咗議員身份，兼且自由黨喺換咗領導層後，反梁味道無咁濃，但一向我行我素嘅榮譽主席田北俊，繼續逍遙海闊天空，同唔少市民一樣，ABC宗旨揸得好緊。
好似星期日咁，身為網球粉絲嘅田少，原來親身入場觀賞香港網球公開賽。喺現場selfie呃like是常識吧，而對田少而言，貼相之外嘅重點當然係抽水，佢喺facebook留言，「支持體育界並唔係求其喺網上截張圖，貼上facebook就當係」。
雖則佢冇點名，但佢嘅hashtag係包括「#講緊邊個？」、「#體育界有貢獻」，相信答案呼之欲出。又睇返吖，神奇小子曹星如之前出戰，CY只喺佢勝出後喺facebook貼咗電視截圖恭賀，相較曾鈺成入場支持，唔使問邊個更有誠意嘞啩！