【三個粉絲追韓劇】熱播韓劇《雲畫的月光》劇情越嚟越緊張，女扮男裝嘅洪樂瑥（金裕貞 飾）因為係逆賊之女而面臨殺身之禍，想知世子（朴寶劍 飾）救唔救到佢，就要追住今晚播出嘅結局篇。樂瑥由細到大都要女扮男裝其實相當痛苦，之不過，如果有一日嘅時間畀你可以女變男、男變女，相信會係一個幾難忘嘅體驗！
無論是港男港女，定韓男韓女，一聽到可以變性一日，都即刻諗起性事。有港女就話想試下打飛機、做「USB」壞男人，有韓女就話要去汗蒸幕沖涼，去男廁「目及」嘢，或者喺街四圍媾女。有啲女仔豪邁啲，就話要用男仔嘅聲線講粗口、喺叢林屙噓噓。
男仕呢？竟然想體驗吓嚟M，話啲女仔成日講到好痛咁，想試吓係咪真係咁痛喎，又有男仔話想試吓做娘娘收兵或者釣金龜。
雖然性別係天性嘅，不過問到如果有得揀，想做女仔定男仔，發現七成受訪者都揀做男仔。港女Charlie話因為唔想戴bra，最重要喺床上可以做主動嗰個！有男仔就話唔想做女仔，因為嚟M好辛苦，或者怕生仔好痛。viu韓劇導賞員阿愁和Daniel都話要做男仔，阿愁覺得男仔之間無咁多勾心鬥角，相處簡單啲，Daniel就話男仔唔使化妝咁麻煩，沖個涼就可以即刻出門口。
而想做女仔嘅，多數本身都係女仔，覺得畀男仔遷就好啲，而且着衫又靚啲，仲可以化妝，做男仔太單調。有位韓仔都話想做女仔，因為唔使服兵役喎！
其實尤其對於韓國人嚟講，做男仔點都着數啲，因為韓國係大男人主義社會。有韓女就話女人打工最麻煩係有咗BB，佢話：「雖然放產假係好正常，但係啲同事要做埋你嗰份，就會畀臉色你睇！」韓女Choe Ji Su覺得韓國喺男女平等方面仲未做到，所以有「玻璃天花」呢個形容詞。
「玻璃天花」即係睇到目標，但上唔到位。《經濟學人》由2013年起首創「玻璃天花板指數」，從教育、就業、人工、做唔做到老細等因素，比較各國職場女性嘅地位同平等狀況，韓國每年都排榜尾，所以計落如果做女人，都係做港女好啲！
主持：動主播阿仙、viu韓劇導賞員阿愁和Daniel
記者及繙譯：卓惠媛(Joyce)
攝影：陳家文、李錦鏵
《雲畫的月光》片段由Viu提供：
https://goo.gl/LCYTGt
【三個粉絲追韓劇】
http://hk.apple.nextmedia.com/enews/animation/kfans/