蘇永康、梁漢文（Edmond）、任賢齊同黃家強組成嘅男人幫，前晚喺澳門開騷，佢哋全程以歌會友，不過蘇永康最後都忍唔住有啲怨言：「估唔到我都有fans，我見到三個康字嘅牌。」小齊就安慰佢，話啲fans收埋晒啲燈牌喺心入面。之後佢哋又喺台上篤爆家強上台時唔記得攞咪，蘇永康笑話：「我真係好鍾意同家強一齊開騷，佢成日都有啲論盡。」
家強唔着衫
另外，今個月係國際乳癌關注月，癌症基金會每年都會舉行「粉紅革命」活動，Edmond老婆林文慧四年前確診患乳癌，𠵱家已經康復，Edmond今年就着住條粉紅色芭蕾舞裙幫「粉紅革命」影咗輯宣傳相。騷後佢哋受訪時，小齊話為支持Edmond，本來打算一齊着粉紅色芭蕾舞裙上台，可惜搵唔到啱着嘅，𠵱家諗緊訂做，小齊話：「下次演出可以着，幫手宣揚吓，你哋試想像家強唔着衫，淨係着芭蕾舞裙彈Bass，幾有型！」家強笑話：「我冇所謂，不如你試吓着住嚟揸電單車，但係唔准着底褲喎。」
Edmond又提議搵陳奕迅（Eason）一齊着，小齊笑話如果Eason唔肯，都會逼佢着。講到Eason呢幾年唱咗200幾場巡唱，賺咗2億，Edmond話：「我哋男人幫開咗23場都冇。」覺唔覺Eason吸金力好強，蘇永康話：「其實佢都付出咗好多，試諗吓佢每個周末都丟低康堤咁去唱就知喇。」
撰文：馮仁昭