今個暑假，相信唔少香港人記得香港女車神李慧詩（Sarah）喺里奧炒車無緣獎牌，同佢相撞嘅澳洲車手美雅絲，噚日宣佈結束運動員生涯。當勁敵兼好友決定退役，Sarah都冇時間理，因為佢喺日本鬥緊車，噚日喺山口縣出戰防府站凱林賽準決賽，大勝五個車位首先衝線。
33歲嘅美雅絲可以話係澳洲國寶，運動員生涯攞過11次世界冠軍，並四次出戰奧運攞到兩金一銀三銅；過去多年同Sarah唔知交手過幾多次，要數最經典，相信係今夏里奧凱林賽，美雅絲同Sarah意外碰撞，Sarah失平衡炒車冇咗爭獎牌機會，不過兩人賽後仲喺賽道上握手，展示出崇高體育精神。
美雅絲噚日透露：「好多人問我，喺奧運後有乜打算，我決定咗結束運動員生涯。過去六個月因為要參加奧運，脊椎注射過六次止痛劑，自己對運動員生涯嘅成就都好滿足。」呢位擁有驚人爆發力嘅車手退役後將會有其他嘗試，不過就冇講係乜嘢。
防府站贏五個車位
至於喺里奧失意嘅李慧詩，最近去日本參加多站凱林賽，噚日喺山口縣防府站準決賽，佢全程留喺車群，等其他車手發力先加速，因實力明顯超班，好輕鬆贏五個車位衝線，躋身香港時間今午2時55分嘅決賽。Sarah呢站最大對手、加拿大蘇妮雲喺另一組亦輕鬆勝出。
