外號十三少的韋達昔日雄霸馬壇時，跑馬攞位出名精靈，被馬迷封為「楔位王」。近年他無疑成績下滑，冇咗昔日霸氣，不過間唔中都有佳作，好似這天第五場五班1400米贏霍利時馬房「正藍旗」咁，末段於馬群中左穿右插殺出重圍，贏個多馬位，十三少盡顯藝高人膽大，單Win及組合獨贏A1分別派85.5及22元。
「正藍旗」的富豪馬主顧明均係大慈善家，捐款不時億億聲，佢同樂壇校長譚詠麟私交甚篤，這天顧明均不在港，由譚詠麟主持大局兼做代表拉頭馬。霍利時說：「我要一讚韋達，雖然直路空位好細，但韋達膽量好大（Gap is small but Douglas's heart is big），勇於在極窄的位置殺上，造就這場頭馬出現。『正藍旗』是典型五班馬，今仗檔位好韋達發揮出色，牠向來有腳患，慶幸近期健康穩定，很高興可以建功。」
霍利時同韋達今季合作愉快，兩人剛周三谷草尾場勝出「越感」，但韋達亦因不小心策騎「越感」，被判處由本月30日開始停賽兩日，這天「正藍旗」之勝，韋達正好彌補停賽損失。
呢場二至四名由「漸信名駒」、「幸運坊」及「有緣好馬」順序瓜分，四重彩派四萬蚊多啲。