港大醫學院噚日舉行130周年院慶啟動禮，醫管局主席梁智仁、食衞局局長高永文同副局長陳肇始等都有到場支持。港大醫學院院長梁卓偉身為主人家，當然要滿場飛啦，全場hyper嘅佢仲好鬼馬，突然邀請民望高同陳副局一齊到嘉年華內嘅波波池，一齊放鬆玩吓！
嗱嗱嗱，八方喺現場睇到㗎，民望高一聽到呢個邀請，當堂打咗個凸，但身為港大校友嘅佢，最後都係決定接受挑戰落場玩吓。初入池嗰幾步佢都仲OK嘅，不過一聽到梁卓偉嗌佢試吓坐低，幾秒之後想話起番身嗰陣，就發現唔夠力支撐身體，雙手舉高投降，要院長伸出友誼之手先企得起身。似乎高局長真係要練吓平衡力喇！