「張強」踩上會德豐新盤售樓處，兼瘋狂表演「吹喇叭」。講緊嘅張強，唔係噚晚大結局套電視劇嗰位，而係英皇國際（163）執行董事張炳強。
會德豐屯門掃管笏新盤Napa噚日繼續開放示範單位，張炳強代表英皇，噚日下晝踩上售樓處，兼同揸盤嘅常務董事黃光耀開香檳，預祝對方賣樓成功，不過張炳強睇落仲興奮過主人家，揸住香檳成支隊，表演「吹喇叭」。
實情係，英皇喺同區小欖與大欖都有項目，踩上Napa售樓處絕非無道理。張炳強話，睇好屯門掃管笏區內基建與綠化設施，係未來大珠三角重點區域，又指近日樓市百花齊放，反映市場需求大云云。