5年嘅前政務司長唐英年，呢個時候已經辭咗職準備參選，但今屆嘅熱馬財政司長曾俊華家吓仲以財爺身份到美國外訪，身在美國嘅佢喺網誌大打溫情牌，藉美國大講社區互助，借題發揮話港人對香港嘅熱愛有增無減，跑馬仔之路又好似踏前一步。
鬍鬚曾話早前到紐約訪問，同當地華人碰面，部份係港大、中大同佢母校喇沙書院嘅畢業生，大家喺中菜館寒暄合照，被集郵都好正常。
喺美國成長嘅鬍鬚曾此行趁空檔返去紐約勿街（Mott Street），話曾祖父喺勿街經營過唐餐館，自己逢周日會到天主教堂，課餘就到醫院同老人院探訪，亦有做義工清潔街道，好有善心咁噃。
「港人歸屬感有增無減」
佢話離開勿街時，遇到一位識佢阿媽嘅華裔移民，對方好熱情咁拉住佢隻手，「在外地生活的上一輩華裔移民，往往都很念舊情，社區裏守望相助，鄉里鄰里之間的情宜（誼）特別濃厚」，繼而話香港社區同屋邨嘅關係或者不及往昔，「但我想香港人對這片土地的熱愛和歸屬感卻是有增無減，只要團結一致，多點互相尊重，多點真誠聆聽，努力做到無分彼此，一定能夠產生更多正能量」。呢啲語調，點解咁似參選宣言嘅結尾嘅？
李八方
mailto:[email protected]