鍾意睇入波嘅朋友，上周六睇西甲就一定睇到過晒癮，因為三支勁旅巴塞隆拿、皇家馬德里同埋馬德里體育會，都喺呢輪聯賽大演入球騷。雖然三隊喺場上都贏得漂亮，不過本來會喺巴塞鬥拉科魯尼亞場波亮相嘅新任巴塞大使朗拿甸奴，就竟然no show，搞到巴塞好尷尬。
細哨曬太陽懶理巴塞
巴塞隆拿喺國際賽前嘅西甲，突然爆冷輸咗畀切爾達，不過喺上周六迎戰拉科嘅聯賽，佢哋就有反彈嘅表現，憑住拉芬拿艾簡達拿梅開二度、蘇亞雷斯同埋後備入替嘅美斯各建一功，以4:0大勝；而呢場傷癒復出嘅美斯，仲被拍到喺被換入場之前無啦啦嘔。係呀！真係嘔咗出嚟呀！證明佢雖然球技如神，但或者心境始終係人，都會賽前緊張嘅。
不過，唔知點解巴塞呢期好似同「關公」好有緣，繼發起我們都是美斯運動聲援美斯逃稅之後，喺上周六迎戰拉科魯尼亞場波，巴塞講到明新任球會大使朗拿甸奴會到場，但結果「細哨」冇蒲頭不特止，仲去咗沙灘玩水，兼喺instagram上載相片；究竟係同巴塞嘅溝通有問題，定細哨真係咁唔畀面呢？
講番西甲，除咗巴塞之外，佢哋嘅死敵皇馬同樣喺國際賽前嘅聯賽失分，打和咗伊巴。不過喺上周六作客貝迪斯嘅西甲，「銀河艦隊」就發威，喺四分鐘就由後衞華拉尼先開紀錄，為大屠殺揭開序幕，之後隊友艾斯高梅開二度，賓施馬、馬些路同埋基斯坦奴朗拿度亦各入一球，最終以6:1大勝。賽後，皇馬教頭施丹都話好滿意麾下球員嘅表現，佢話：「最令我開心嘅係，球員喺大幅領先之下，仍然保持積極嘅比賽態度。」
馬體會反勝7:1保榜首
不過，講到最威嘅，就一定係一哥馬德里體育會，佢哋喺上周六嘅西甲 迎戰CF格蘭納達，雖然喺18分鐘先落後，但憑住恩歷克卡拉斯高連中三元，奧斯華度加坦梅開二度，同埋安祖哥利亞、堤亞高文迪斯入波，以7:1反勝兼保住今季不敗之身，仲穩坐榜首位置㖭。