澳洲騎師這天贏開有條路，第三場有祈普敦爆冷贏「搵銀天皇」，到第四場四班泥地1200米，輪到大師兄柏寶攞威，佢重新接手蘇偉賢馬房「真好漢」，人馬之前合作最叻第三未贏過，六歲馬今次藉1檔之利，以4.4倍大熱身份貼欄帶頭，大勝四又四分一馬位，創今季贏最遠紀錄，組合獨贏A2派19元。
與「真好漢」同主的「真如燕」上季尾退役，「真如燕」服役兩捷都由柏寶於泥地短途交出，至於「真好漢」出道首季隸屬鄭俊偉馬房，上季起轉至蘇偉賢旗下，並於6月12日由郭能贏四班田草1400米開齋，這天則在泥地重開勝利之門，一放到底對手完全冇得追，累積近八戰兩勝四位一第五，僅前仗因蔣嘉琦墮馬而不獲獎金，六歲馬似有大器晚成之感。
呢場二至四名順序為「情意相投」、「執子之手」及「旅英駿爵」，前兩駒都係熱門，後駒則是啡燈大幅落飛馬。當中「情意相投」首度配莫雷拉即初次入Q，雷神這天前四場雖然贏唔晒，但就勁取兩冠一亞一季，火速於騎師王掟甩對手。