猶記得剛周三快活谷夜馬，雷神一開局直落連贏四場，最終個人在谷草一晚五捷。事隔四日，呢位神級騎師似乎有心重施故技，這天佢於沙田以姚本輝馬房「志友運」食出頭糊後，第二場五班1600米，馬上再贏大摩馬房「太皇鷹」，一手包辦一口開齋馬孖寶。當中「太皇鷹」第25次在港出賽首度贏馬，單Win及組合獨贏A1分別派43.5及15元。
「太皇鷹」馬主係顏傑強，呢日佢冇現身，由年邁的前練馬師「飛機陳」陳毓麟代拉頭馬，「飛機陳」少年時曾任戰鬥機機師，本月下旬將91歲，但仍精神奕奕。五歲法國自購馬「御皇鷹」以往跑極唔贏最叻第二，評分持續下跌，係大摩少有的五班馬。今次搵番開鑼日騎過的雷神操刀，人馬合作留前鬥後，拉士於外叠以較佳衝刺贏頸位，冚過內側兩駒「塑料喜」及「樂家將」，打開在港勝利之門。
相反「塑料喜」直路起勢內閃難以催策，大熱門最終又係第二，應贏而僅敗，700萬拍賣馬始終出唔到頭，至於孫柏文愛駒「樂家將」末段一度走甩，最終埋唔到尾只得第三，亦開唔到齋。第四名為另一匹未勝馬「天賦致寶」，四重彩派一萬一千幾。