盲門一係就延續、一係就打破，這天第八場三班泥地短途1200米屬於後者，主角蘇偉賢馬房、韋達座騎「添好運」以新勝馬身份再贏一次同班同程，今季首匹連捷馬就此誕生，單Win及組合獨贏A2分別派46.5及17.5元。
蘇偉賢同韋達都係這天起孖人物，蘇偉賢第四場泥地賽和柏寶聯手贏「真好漢」打好底，馬房就此囊括全日兩場泥地頭馬，至於韋達連同第五場勝出霍利時麾下「正藍旗」在內，亦告季內第三度起孖，累積11場頭馬拍住排騎師榜第二位的潘頓，兩人頭馬數字暫時一樣。
五歲馬「添好運」上季出道頭兩場全勝，俱贏草地直路賽，近期改變發展方向移師泥地，今場留前鬥後全程蝕位亦衝贏對手彈甩個多馬位，泥地兩出兩捷，好明顯已經找到新出路。相反由港澳馬主陳志明擁有的「香江穩勝」放到拉士被趕過，今季轉戰泥地兩出兩亞，灰馬累積七次第二，仲未打開在港勝門。
呢場泥戰賽果正過正菜，事關全場最熱四駒包辦前四名，當中季、殿軍順序「藍天飛馬」及「按得澄」，四重彩派2,353元，係整日暫時最熱一場。